Պաշտոնական Թեհրանը պնդում է՝ Իրանի ուրանի հարստացումը որպես իր միջուկային ծրագրի մաս «քննարկման ենթակա չէ»։ Այս մասին հայտարարել է Իրանի արտգործնախարար Աբբաս Արաղչին՝ արձագանքելով ԱՄՆ հատուկ բանագնաց Սթիվ Ուիթքոֆի՝ ուրանի հարստացումը դադարեցնելու Թեհրանին ուղղված կոչին։
«Մենք պատրաստ ենք վստահություն կառուցել հնարավոր մտահոգություններին ի պատասխան, բայց հարստացման հարցը քննարկման ենթակա չէ», -հայտարարել է Իրանի դիվանագիտության ղեկավարը։
Թեհրանից ու Վաշինգտոնից այս հայտարարությունները հնչում են ԱՄՆ-ի և Իրանի միջև անուղղակի բանակցությունների երկրորդ փուլի նախաշեմին։ Օմանում կայացած առաջին քննարկումներից հետո ԱՄՆ հատուկ բանագնացը հայտարարել է՝ Իրանը միջուկային համաձայնագրի շրջանակներում «պետք է դադարեցնի և հրաժարվի» ուրանի հարստացումից։ Նախկինում Վաշինգտոնը Իրանից պահանջում էր վերադառնալ 3.67 տոկոս հարստացման մակարդակին։
Արտգործնախարար Արաղչին դատապարտել է Թրամփի վարչակազմի նոր պահանջները՝ դրանք որակելով «հակասական դիրքորոշումներ»։
